على مائدة الإفطار (الحلقة الثالثة) حوار مع الأخت منة الله .. تقدم واسئل

بسم الله، سأتشرف بالأسئلة:

1-كلنا يعلم أن في رمضان تنهمك النساء في الطهي والترتيب ليوم رمضان،
فتغرقن في العمل على حساب استغلال شهر رمضان في مضاعفة الطاعة وقراءة القرآن، السؤال قد بان: كيف توفقي أختي الكريمة بين الشغل والطاعة في رمضان؟ فلربما تكون نصيحة لمن يدخلن هذه الصفحة بحكم تجربتك.

2-صراحة، هل أنت طاهية بارعة أم "نُص نُص"؟

3-شيئ طريف يقع...يقال أنه يحق للمرأة الطاهية في البيت أن تتذوق الطّعام لتعلم أنه "مالح أو مسّوس" "طايب ولا يخصو شويّة" للأهل أو للإبن الصغير، لكني لاحظت شيئا (طريفا) من خلال أمي وعماتي أنهن يرغبن عن هذا وتنفر منه نفوسهن، فهل أنت ترين مايرون؟

4-ماهو شعورك إن تذوق أهلك ما طهوت وقالوا "مالح ياو!" أو "هاي! يخصو الملح!" ..أو يقولون عند تذوقهم للشربة: "أوو حرقتيلنا لساننا واش هذا؟ علاه ما طيبتيش الشربة بكري"؟

أرجو أن تكون أسئلة خفيفة عليك،
أسأل الله لك التوفيق والسداد.

 

السلام عليكم ورحمة الله وبركاته

تحية طيبة للجميع

شكرا للأخ جمال على اختياري

سعيدة بتواجدي مع اخوتي على مائدة الافطار

فقط بلعقل عليا شوية يا جماعة الخير راني نشوف هجوم شرس من اول يوم

لكن أنا لها بإذن الله

سأبدأ بأسئلة الأخ جمال ثم البقية

اتمنى ان اوفق في الاجابة على كل الاسئلة

ويكون الحوار جميل وممتع


​

 

لا يوجد طبق معين افضله فيقل أكلي كثيرا في شهر رمضان وخصوصا بالنسبة للفطور اعاني من مشاكل في الهضم ولا يمكنني تناول الا كميات قليلة جدا وأغلبها سوائل لذلك أفضل في


الفطور : السلطة بشرط نحضرها انا بنفسي
السحور : فواكه وخصوصا التي تحتوي على نسبة ماء كبيرة
​

نعم مرتين لانه الوالد هو المسؤول عن مهمة ايقاضنا
في المرتين كان مسافرا وغائبا عن البيت
وكلنا من كثرة السهر والتعب نمنا الى بعد اشراق الشمس
الغريب أنه لما اتسحر اشعر بالجوع ابتداء من 10 صباحا وفي المرتين التي لم اتسحر لم يحدث ذلك
ولم أشعر بالجوع لكن شعرت بإعياء شديد وارهاق وحاولت ان لا ابذل جهد كبير وتركت المطبخ لأختي وأمي

​

في المنزل لأن المسجد يبعد كثيرا عن البيت وحتى الوالد يصلي في مصلى في الحي وهو خاص بالرجال فقط

جزاك الله كل خير أخي جمال
رمضانك مبارك وتقبل الله منا ومنكم صالح الأعمل



​

 

وعليكم السلام ورحمة الله وبركاته
​

وانت بألف خير عزيزتي

​

اللهم آمين
​

أهلا بيك حبيبتي هدى تسلمي يا غالية
​

جاهزة بكل سرور ماتخميش عليا
​

اممممم في الحقيقة نحس بمتعة عند الطبخ ونحب نحضر كل شي ماعنديش اشكال
لكن نحب دائما اطباق مميزة وجديدة ونحب ننوع ونخرط بزاف ههه
ودون التخلي طبعا عن اطباقنا التقليدية

​

دعوات كثييييرة في الحقيقة خصوصا في هذا الشهر الفضيل
لكن في الوقت الحالي واليوم بالضبط أخي مقبل على عملية جراحية خطيرة على مستوى العين واحتمال كبير ان يفقدها كلية

فأسأل الله العظيم رب العرش العظيم أن يشفيه ويعافيه وأن يخرج منها مبصرا و سالما



حفظك الله و رعاك

جزاك الله كل خير وحفظك وسدد خطاك






​

 

الشرف لي أخي انفومان

نعم هذا صحيح عمل المرأة في البيت وأشغالها يزيدو كثيرا في شهر رمضان والوقت يكون محدود جدا وخصوصا اذا كانت عندها اطفال صغار وماكاش لي يساعدها
الآن ماعنديش مسؤوليات كبار ماعنديش دراري وخاوتي اصغرهم 13 سنة
وماكثة بالبيت يعني وقتي كله مقسم بين الطاعة والتقرب الى الله والطبخ وبعض اعمال المنزل والمنتدى
يجب التصرف بالوقت بحكمة وذكاء وهمة عايلة خصوصا في شهر العبادة ودائما نحسو بالنقص مهما عملنا
أحاول التوفيق قدر الامكان في ذلك بـ :

- عدم الخروج من المنزل إلا للضرورة لعدم الشعور بالتعب من جهة واستغلال أمثل لليوم والوقت يكون كافي
- الابتعاد قدر الامكان عن تضييع الوقت بمشاهدة التلفزيون
- الابتعاد عن النوم في النهار لساعات طويلة وحين التعب ناخذ قسط قليل من الراحة فقط
- تخصيص اوقات للخلوة والعبادة وتكون متفرقة ليلا ونهارا
- المحافظة على الصلوات في أوقاتها أهم شيء عندي و محاولة الاكثار من النوافل قدر الامكان
- الاكثار من ذكر الله بعد كل صلاة و حتى اثناء العمل وامام شاشة الكمبيوتر وانا في السيارة اذا خرجت
- المواظبة على حفظ القرآن والمراجعة خاصة بحلول الشهر الفضيل والمشاركة في الدورة بفيض القلم زاد من همتي كثيرا

وبالطبع نحس دائما اني بعيدة و لازم نعمل اكثر كالمواظبة على الذهاب الى المسجد
وعدم ترك مجال لظروف الحياة تتغلب عليا

بصراحة نعم
أجيد الطبخ الحمد لله مع اني كنت سابقا نكره نسمع اسم " الكوزينة "
اول مرة بديت نطيب يمكن في السنة الثانية ثانوي يعني 16 او 17 سنة
كان ذلك في شهر رمضان كانت امي مريضة واضطريت انا نتولى البيت والطبخ باعتباري اكبر وحدة في اخوتي
المهم بارشادات وتوجيهات من الام جوزت ستاج هاداك الوقت ورجعت احسن منها وديتهالها ههه
تزعف وتديقلها كي نقوللها ماتعرفيش خلي انا نطيب
لكن مازال البغرير والمحاجب مستحيل نقدر نديهالها فيهم غير بعد كاش اربعين سنة يمكن

المهم احببت الطبخ واصبحت نتابع برامج الطبخ ونبحث دائما لتعلم المزيد خصوصا بعد نهاية الدراسة

لي يمس نقطعلو يدو ههه
نعم مانحبش نتذوق ولا نذوق شخص اخر ماعلاباليش علاه إلا نادرا جدا
لانه مقدار الملح معروف خصوصا اذا الطبخة تم عملها اكثر من مرة ودلائل نضجها واضحة وكثيرة
والخبرة والتجربة تعطي للمراة ثقة بالنفس تخليها تستغنى عن ذلك

​

هههه ندير حسابي لكل هذا اكيد نشعر باحباط
لكن الحمد لله عاقلين واحد مايقدر يتذمر بهاذ الشكل واذا صرات ودارها كاش واحد وكان والدي ولا والدتي نحمل
لكن اذا واحد من خاوتي :
صبتها وتزيد تهدر ايا كول واسكت تشو

بالنسبة لمقدار الملح في شهر رمضان نخاف وننقص شوية باش مانحسوش بالعطش
لان المسوس يداوى لكن الخوف من المالح
تصرا أحيانا وين تكون نوعية الملح عيانة أو لأسباب معينة تزلق اليد ويجي الاكل مالح الله غالب

الشربة دايمن بابا يحب يزيدلها شوية ملح الباقي لا ياكلوها عادي
وهو ايضا الوحيد لي مايحبهاش سخونة بزاف
لذلك دايمن لازم نطيب بكري ونسقيلو هو اول واحد وقبل 5 دقايق او اكثر من موعد الآذان

والمراة مهمتها صعيبة بزاف في البيت
لذلك لازم يكون شوية تفهم ومساعدة وعلى الاقل كلمة شكر
يعني طول اليوم توقف باش تحضر مع الاخير تلقى تعبها بلا فايدة
مرة زوج ثلاثة تولي تكره الطبخ وتفشل

​

جزاك الله كل خير أعجبتني اسئلتك كثيرا
لكن دات مني وقت طوييييل للاجابة

حفظك الله أخي
اتمنى ان اكون وفقت في الاجابة على اسئلتك جيدا

​

 

السلام عليكم ورحمة الله وبركاته



يا مرحبا ..يا مرحبا بالغالية منة الله

أولا صح فطورك و ربي يتقبل منك و منا جميعا الصيام و القيام


و ثانيا اتمنى ان تكون اسئلتي خفيفة عليك عزيزتي


_ زمان كانوا الجيران كلهم بيت واحدة و كانوا يخلقوا خصيصا في رمضان جو رائع من التكاتف و ماكاش اللي ما تذوقش جارتها من واش طبخت لكن الآن اختفت هاته المظاهر و اختفت معها حبال التواصل

يا ترى منة الله :كيف شايفة الأمر و هل تتمناي ان تعود هاذ الظاهرة ام العكس ؟


- الصدقة شيء جميل جدا و محبب و خاصة في شهر رمضان ، هل تعطي منة الله صدقتها لمن ولى و خاصة ان الكثيرين اتخذوا من التسول مهنة و تقول المهم النية أم انها تحترس و تفتش عن الناس اللي يسحقوها حتى تمدهالهم ؟



- نسمع عن الكثيرين يقاطعوا و يخاصموا بعضاهم لكن مع دخول رمضان يعاودوا حساباتهم و يحبوا يبداو الشهر و هما حاسين برضا الله لا بسخطه

هل منة الله تبادر بالصلح و التسامح و خاصة مع دخول رمضان ام ان عزة النفس الكذابة تخليها تحجم ؟



آخر سؤال
شريتي حوايج العيد ولا مازال ؟
ولا منة الله تقولك كيما الكثيرين العيد للأطفال



خلاص راني كملت ،سامحيني الا كثرت عليك




تحياتي

 

وعليكم السلام ورحمة الله وبركاته

الله يسلمك خويا
​

حارتنا أو حومتنا هادئة جداااااااااا عالعام حتى في شهر رمضان واحد ما يشوف الثاني وكل واحد غالق بابو على روحو
للأسف هنا مانحسش بفرق بين رمضان والاشهر الباقية

لكن الأجواء الرائعة هي في الجزائر العميقة والحارات الشعبية
أجملها حي باب الواد ( حومتي سابقا ) رمضان يعطيها صورة رائعة وخاصة جدا
في النهار الغاشي بزاف حيوية ونشاط كبير حتى لموعد الآذان
محلات الشربات والقلب اللوز غير هما والأحسن في العاصمة كلها
وليلا الجو أروع الناس غاع برا القليل لي يقعد في الدار حتى ماتلقاش وين تمشي
المحلات مفتوحة كلها والأضواء شاعلة والأنوار كثيرة وملونة
سهرات وقعدات حتى للصباح

وبالنسبة للبيتنا عائلتي صغيرة وماعندناش اتصال مع الجيران
يعني ماكاش لومبيونس غير اذا حضرو الأهل والأحباب
وهاذ العام مالتيناش بسبب مرض أخي
لكن عشت مرتين فطور وسهرة وجو رائع في بيت خالي وبيت جدي
كان عددنا كبير حول مائدة الافطار
والسهرة تبدا بعد صلاة التراويح الكبار مع القصرة والضحك والصغار يلعبو في الوسط
​

السلطة تكون غنية جدا و مخللة مليح ونحبها بالقارص (الليمون)
​

قبل ما نرجع لفيض ونحل مشكل الجهاز والخط الهاتفي كان وقتي كله نقضيه تقريبا في البيت واليوم نقسمو بين الطبخ وشغل الدار
الصلاة وحفظ القرآن
الراحة والنوم
وماكنتش نسهر بزاف
والآن بعد عودتي لفيض تخلطت الحالة شوية
لكن مازالني محافظة على ذلك استغنيت فقط عن ساعات الاستراحة في النهار ورجعت نسهر بزاااف

​

بارك الله فيك أخي محب الله
​

منا ومنكم

أعتذر عن التأخير بالرد انشغلت شوية
ماتخبيت وماخفت
لكن الظاهر انه اسئلتك فيها ألغام
شحال من مرة نكتب الرد على اسئلتك ومن كثرة اني نطول ننسى روحي ندير معاينة أو اعتماد ومانعملش كوبيي
فيطييييييير و يروح غاع وش كتبت في الهواء بعد الخروج التلقائي
واصاب بالاحبااااط ونأجل الاعادة

ربي يقدرني سأعمل جهدي للأجابة على كل الاسئلة






​

 

وعليكم السلام ورحمة الله وبركاته

تسلمي عزيزتي وانت بألف خير

لا أتذكر بالتحديد لكن كنت صغيرة جدا

مثل كل الجزائريين
طبعا الشربة لازم كل يوم
لحم لحلو مانحبوش لذلك مايهمنيش يكون او لا
السلطة لالالازم
بوراك أو أي نوع آخر من المقبلات
وطبق آخر كل مرة واش تنفحلي

لحد الآن مازالني في بيت أهلي
لكن ماعندناش هذه العادة
و نهار نروح لبيتي على الأغلب ماشي أول يوم من رمضان نفطر في بيت أهلي يوم آخر الشهر طويل
ونعرف أنه من عادات الجزائرين العروس الجديدة أول رمضان ليها في بيت زوجها تقضي الشهر كله مع أهل الزوج أي مع حماتها إذا كانت ساكنة مستقلة عنهم ووحدها

هههه نعمممممم
مرة كي كنت صغيرة صمت وعطشت بزااااف
وأنا نتوضا شربت شوية ماء وطبعا ماسمع بيها حتى واحد من الأهل

اسئلتك كانت سهلة وخفيفة نهار يجي دورك ختي نور ماتخميش نردلك خيرك هههه

حفظك الله
​

 

وعليكم السلام ورحمة الله وبركاته

ربي يخليك حبيبتي

​

قستي الجرح

ملي رحلنا من باب الواد راحت حلاوة رمضان مع الجيران
كنا ماكاش لي يقول هاذ الحاجة تاعي
واي وحدة تطيب تذوق لغاع الجيران أو للأقرب ليها اذا ماطيبتش بزاف لكن المهم ماتاكلوش وحدها
كان والدي كي يقضي ويجي طالع للدار لي يتلاقى بيه في طريقو يجيبو معاه وحتى بلا ما يعرضو يتبعو

وكان الواحد منا وين يشم ريحة اكل بنين يدخل ياكل بدون اي حرج واهل الدار يفرحو وما ينزعجوش منو و يفتح القدر و يسقي هو لروحو وياكل معاهم أو حتى يدي الطبق معاه اذا كان مستعجل

كانوا النساء كلهم يعجنو ويديرو المطلوع ويتبادلو بيناتهم وفي كل دار تلقاي سلة المطلوع ميلونج مشاركين فيها كامل

السهرة كانت دايمن في السطح كل وحدة تطلع الطبق الحلو ديالها ولاتاي ويجتمعو كلهم على مائدة وحدة
وفي ايام البرد والشتا كانو يتلاقاو كل يوم في بيت كاش وحدة يسهرو حتى لساعات متأخرة من الليل

كان تواصل وتكافل كبير جدا بين الجار وجارو
لكن الآن رح غاع هاذ الشي
انقطعت العلاقة وحبال التواصل بين الجيران
حتى افشاء السلام يكاد ينقرض هو ايضا
واصبح اي واحد لما يفكر يدعي شخص للفطور او السهرة يفكر مباشرة في احد اقاربه او احبابه ومايخممش في جارو تع الباب للباب

اكيييد نتمنى انه جيلنا يحافظ على الحياة لي كانو عايشينها اجدادنا واباءنا والمبادئ والقيم لي وصاونا ورباونا عليها
ونعيشو شهر رمضان بقلب واحد

دائما انا في خلاف مع أختي التي تصغرني بسنتين في هاذ الأمر هي وين تمشي توزع مايهمهاش
لكن أنا لازم نتأكد مليح أنه الشخص أهل لها ويستحق الصدقة
أكره صورة عندي لما نشوف ظاهرة التسول والتي اصبحت مهنة كيما قلتي للكثيرين
بل شركات كبرى مختصة في هاذ المجال

صدقيني نحب نبكي كي نشوف مثل هذه النمادج :

- رجل في الخمسينات او الستينات على الاكثر
تصوري انه سااااااااجد لعباد وخلق الله يطلب الصدقة

- امراة بالجلباب والستار وحتى القفازات يعني بكامل اللبس الشرعي
اعوام وسنين طول نلقاها دائما جالسة على الأرض على درج صغير وضيق جدا في السوق تتسول اخر مرة شفتها اول اسبوع من شهر رمضان هذا

- ومرة سمعت قصة من مصدر موثوق هي لامراة عاملة ماعندهاش الوقت لتربية طفلها فتخليه عند مربية اطفال مقابل مبلغ مالي شهري يتعدى 5000 دج
المهم هاد المراة كانت تحممو كل يوم صباحا وتديه نظيف كي ترجعو في المساء تلقاه متسخ وتكرر الامر وكانت دلائل كثيرة خلاتها تشك
مرة بعدما حطاتو في بيت المربية
نزلت وبقات في مكان بعيد تراقب وتتنظر بعد مدة لقات المربية نزلت بالطفل وخارجة بيه
تبعتها الى ان اكتشفت امرها
ولقاتها تستخدم ابنها وسيلة للتسول اي لنيل شفقة وعطف الناس بالرغم من انها عندها سكن ووضعها جيد وتعمل وعندها مدخول شهري

- في حافلة نقل الطلبة الكوس يطلع متسول يزعم انه ماشي من العاصمة جا من بعيد ويعطي اسم ولاية ويطلب مبلغ معين باش يرجع لدارو بزاف يمدولو ووحدة مدتلو كامل المبغ لي طلب ومع ذلك كمل يمد يدو ويمر على كل كرسي وكل واحد وكي يهبط يروح للكوس الموالي والحادث تكرر امام عيني مرات عديدة بنفس السيناريو مع اختلاف بسيط

- وخالي مرة يحكينا كان خارج من لا بوست جبد دراهم جاتو وحدة حاكمة ordonnance تطلب دراهم باش تشري دواء كيما اصر عليها باش هو يشريهولها بنفسه ماحبتش زعما انه الدواء مفقود وماشي متوفر غير في صيدلية معينة تعرفها
المهم عطالها المبلغ لي طلباتو وتبعها يشوفها وين تروح لقاها راحت لشخص اخر تعاود نفس الحوار والقصة
راح ليها مباشرة نحالها وش عطاها هههه

الخلاصة من كل هذا : التمييز بين الناس سهل جدا فقط بشوية تفكير
برايي انه الانسان لازم يحكم عقلو شوية ومايكونش غبي لدرجة انه ما يفرقش ومايعرفش لمن لازم يتصدق صح إلا اذا كان غرضه التفاخر

من عادتي انه ننسى كثيييييرا حتى في دارنا وبين أهلي كي نزعف نتوعد مع الخصم انه مانزيدش نهدر معاه وخلالالاص
لكن مانفيقش بروحي نروح لعندو ونهدر عادي
غير اذا لقيتو مشنف ومنايفني نتفكر بلي تخاصمنا
واحيانا نبقى نحاول نتفكر لساعات سبب الخصام ووش قلت ووش سمعت

احيانا نتقلق من الامر
لكن الحمد لله ماعنديش النيف واذا جربت معاه ساعات او ايام على الاكثر

اذا حسيت انه غلطت ولو احتمال صغير نتبعو ونعتذر ماعنديش اشكال بالعكس نحب نرتاح ونقبل نكون مظلومة ولا ظالمة

يعني الخصام مانخليهش يستمر ولا يلحق عليه شهر رمضان
وفي هذا الامر خصوصا نعتبر شهر رمضان مثل بقية الاشهر فالمسلم لا يعادي أخاه أكثر من ثلاثة أيام

ههههه ماااااااازاااااااااال

علاش الاطفال خير منا
مازالني نحس روحي طفلة ونبقى هكذا

نقولك على سر وخليه بيناتنا
ماشي غير حوايج برك لي نشري
صباح العيد لالالازم نعمر الدار بالنبولات
بكل الالوان والاحجام
هههههه

بالعكس سامحيني انتي على ردي الطويييييل
سعدت بأسئلتك القيمة حبيبتي سندس
حفظك الله ورعاك






​

 

وعليكم السلام ورحمة الله وبركاته

QUOTE]

اللهم آمين

شحااااال وانا نخمم في سؤالك مانتذكرش مليح مليح لكن الحدث الطريف لي دايمن يتكرر في رمضان خاصة هو " النوم "

انا عادة نحب نرقد بكري ومانسهرش بزاف غير اذا شربت كاس قهوة او لاتاي ودائما نتفاداهم كي نعرف روحي تعبانة ولازم نرقد غير للضرورة
واذا كانت سهرة وماشربتش نشبع تبهديل دائما
لاني نحاول نقاوم لمدة قليلة لكن يبان عليا التعب والدوخة ونبقى نسمع فقط لحديثهم ونحس روحي نبدا نبعتد شيئا فشيئا ونهبط ونهبط حتى خلالاص نرقد في مكان جلوسي في الصالون بلا مانجيب خبر والجماعة يعيطو ويقصرو وانا بحححححح ماكاش
وكي يشوفوني ويفيقولي يديروني مضحكة
حتى يجي كاش واحد يديني للغرفة وغالبا ما يكون خالي ومانسلكش منو يحاول يفتحلي عينيا ويخربشلي في اذني وفي شعري باش نفطن وانا مصروعة وماينساش في السحور يفكرني ويحكيلي ويضحك عليا


ربي معاك لأسئلة راها كثيرة
الحمد لله فريتها

ربي يجازيك اختي خديجة

​

 

القارص من بكري شانو عالي والان مقامه زاد على وصل حتى ل 450 دج للكلغ
المفروض كنت نشترط 10 كغ منو على مائدة الافطار ولا مانردش على الاسئلة ههه

​

انا سعدت اكثر بالاجابة على الاسئلة المميزة والتحاور معكم
اتمنى نكون وفقت في الاجابة
اعتذر ان خالفت القوانين وكملت رديت بعد انتهاء الحلقة
لكن كان لازم نرد على جميع الاسئلة خصوصا وانه بقات وحدة
والأخت خديجة غالية ماكانش ممكن نجوزها

واذا فيها بيناليتي ماعليش مستعدة نخلص ( ماتكونش 10 كلغ قارص برك هههه )

لكن على هاذي المفروض الحق ليا

شكر للجميع وكلكم جاية دالتكم ان شاء الله
والشكر موصول لك اخي محب الله على الفكرة الجميلة والاشراف بارك الله فيك

بصراحة احترت وحبيت لو اخترت مجموووووووعة كاملة غاع يجوزو
لكن اختياري رح يكون :
.
.
.
.
.
.
.
.
.
.
.
.
.
.
.
.
.

سندس
علابالي بيك مشغولة بزاف سامحيني
لكن ماعليش انت قدها ما يتخافش عليك
خفت يفوت رمضان ومانتشرفوش بيك على المائدة
قلت نسبق بيك احسن
في انتظااااار تشريفك
​