على مائدة الإفطار (الحلقة الأولى) حوار مع الأخ محب العلم .. تقدم واسئل

السلام عليكم ورحمة الله وبركاته

هذي هي المفاجأة يا محب الله !!!!!!!!!!!!!!!!

معليش راهو جاي دورك

المهم إخوتي أكون في فيض بعد العاشرة والنصف ليلا
يمكنكم ترك أسئلتكم وسأجيب عنها ليلا او غدا فجرا بإذن الله

لكن ما قلتوليش ........ واش راكم دايرين فطووووور على المائدة
راني جيعاااااان

 

راني رايح نبدأ الأسئلة

وما تخممش أخي محب العلم مانيش راح نصعب ..

عادي خويا تعرفني ديما محضر نفسي

وكما قال الأخ حمزة الأسئلة مشي محرجة لكن تربك العضام هههههه ....

1 - أول سؤال وهو ساهل بزاف

هل تتذكر متى صمت أول مرة ؟ وكيف كان شعورك ونظر العائلة تجاهك ؟
مانيش متفكر بالتحديد اليوم غير أني كنت صغير جدا يعني صمت قبل أقراني وكانوا في الدار فرحانين بي أكيد لكن بصراحة ماكنتش نحس في ذلك الوقت ههههه


2 - الفطور تع اليوم .. لي فطرتوا واش رايك فيه ؟ كان يشهي ولا طبع برك

أحكينا قصتك معا هذيك الشربة .. ( شهية طيبة محب العلم )

ههههه الفطور طيباتو أختي ربي يخليهالي طبعا كان شهي خصوصا مع البوراك اليوم وين كليتو ملي بدا رمضان
والشربة واش نقولك الايام الاولى لرمضان نكون ناكلها بشراهة وكل ما تمر الايام نبدا نكره حتى في الايام الأخيرة تع رمضان ما ناكلهاش كامل



3 - واش رايك في رمضان في الصيف ؟ جاز عليك صعيب ؟ عطشت ولا جعت ؟ أحكيلنا

العطش دار فيا حالة .. امس ماكليت والو غير الماء والقازوز
وعموما قع اليامات راهم جايزين هكذا العطش بزاف

4 - بما أنك تخدم هذا العام في رمضان ، واش رايك رمضان بدون عمل يعني في الدار مع الرقاد والمنتدى ولا العمل خير؟

فوووووووور ... مع العمل راني كاره واش نقولك
وزيد نقولك حاجة تفاجأك .. راني نخدم بعيد على الدار ونجي كل يوم نفطر في منزل الوالد وبعدها نروح لمنزلنا نصلي ونبات ثم
يعني نخدم في مكان ونفطر في مكان ونصلي التراويح ونبات في مكان ... ربي يصبرني
رمضان في الدار نعمة كبيرة ما يحس بيها غير بحالي ههههه

5 - وآخر سؤال لنهار اليوم، كيفاه تجوز سهرتك مع الدار في رمضان والتاي ... ووو حلوة ولا الفطار خير ؟
راح نبكي ههههه ... غير انا وأخي في الدار لا سهرة لا والو
ديجا نخرجو من الصلاة متاخرين ندخل مباشرة لفيض نريح شوية وإلى النووووم لأني كي نوض في الفجر ما نعاودش نولي نرقد
قتلك رمضان هذا العام خاااااص جدا بالنسبة لي لكن الحمد لله

أسئلة هذا اليوم تكفي وما زال القدام إن شاء الله

ننتظر أسئلة الجميع

أخوا المدير في ورطة .

وقيل انت لي راك في ورطة هههههه
ماكاش لي سألني من غيرك ههههه اجري على روحك خويا ... موضوعك راهو في خطررررررر

ربي يجازيك خويا عماد

 

بسم الله الرحمن الرحيم
السلام عليكم ورحمة الله وبركاته

وعليكم السلام ورحمة الله وبركاته أخي المتميز

أهلا بيييك راك سلكت محب الله من الورطة هههه

فكرة رائعة ... أرجو أن تقبلوني بينكم

أسئلتي اليك أخي الكريم محب العلم كالآتي :
1- ما هي أكلتك المفضلة؟

المثوم ... لكن باللحم فري مشي كونجلي هههه
نموت عليه

2- هل تقبل دعوة مني للفطور في رمضان ؟

ربي يجازيك خويا ولكن الوقت ما يسمحليش
مشكور على الدعوة خويا

شكرا لك وبارك الله فيك أخي الكريم على كل شيئ

هذا واش عندك أسئلة ؟؟؟
هيا بروفيتي لي راح في المائدة اليوم ما يجيش كل يوم ههههه

ربي يعيشك خويا المتميز

 

السلام عليكم ورحمة الله وبركاته



صح قطوركم جميعا







كنت موجدة اسئلة كتيرة بصح سبقوني الأخوات في بعض منها



سؤالي الأول : ما هو شعارك لهذا رمضان ،

هل قررت ان تغير شيء ما في حياتك ابتداءا من هاذ رمضان ؟


سؤالي الثاني : هل من طرفة حدثت لك في يوم ما من ايام رمضان ؟


سؤالي الثالث : يا درى تشرط على اهلك في الماكلة ولا الواجد هذاك هو، و لو كان نتاع البارح ؟


اكتفي بهذا القدر من الأسئلة


و السلام عليكم

 

السلام عليكم ورحمة الله وبركاته
وعليكم السلام ورحمة الله وبركاته

ما شاء الله موضوع طريف ومميز بوركت اخي محب الله

اعتقد حسب ما قرأت بالموضوع ان فرصة الدعوة على مائدة الافطار متاحة ليومين فارجو ان تقبلوني ضيفة على مائدتكم الكريمة هذا اليوم وساطرح اسئلتي الان لاني لست متاكدة من تمكني من الحضور ليلا

*******

على حساب ما راني شايفة مديرنا الكريم راه في محمكة الاستجواب الله يعينه، اكيد ماشي متهم بل الضيف الرئيسي
* على مائدة الافطار*

اسمحلي اخي محب العلم بطرح الاسئلة واتحملني يمكن نكون ثقيلة في الحقيقة حيّرنا اخونا محب الله ماخلانا ما نسئلوا

تفضلي
*******

سؤالي الاول: كامل نعرفوا بلي للصائم عند فطره دعوة لا ترد بصراحة خويا المدير بعد يوم عمل متعب والعطش الشديد والمائدة قدامك منوعة بالاكل اممممم ... تتفكر الدعوة بعد التمرة الاولى ولا حتى تشبع البطن وتبرد قلبك في الماء ههههه ؟

الدعاء عادة أقوله وانا راجع من المسجد بعد المغرب وأحيانا أنساه للأسف


السؤال الثاني: اذا كانت اجابتك حضرة المدير نعم رح يكون اكيد دعاء مميز كونه لا يرد. لحد ليوم بصراحة دعيت لنفسك برك ولا تفكرت عضو من اعضاء فيض؟؟؟

لم أذكر شخصا بعينه





ثالثا: بما انك تعمل طيلة الاسبوع بعيد على الدار، الويكآند اكيد تكون مميزة لانك في راحة وفي كنف العائلة الكريمة .
في السهرة خاصة اذا كانت العايلة متجمعة على لاتاي وقلب اللوز وين تفضل تكون مع عائلتك الاولى او الثانية( فيض القلم) ولاّ تجمعهم في زوج ؟؟

هكذا وهكذا ... لكن بصراحة في المنزل يقولولي انت مدمن على الانترنت وما تقدرش تعيش بلا بيها
وفعلا غالب وقتي أقضيه مع فيض
لكن لما تجتمع العائلة تحلى القصرة خصوصا لما يجو الصغار .. يقولولي عمو وخالو ما نصبرش عليهم نلعب معاهم بزااااف



سؤالي الاخير محرج اتحمل اختك الثرثارة
هل مديرنا الكريم من الناس لي تنوض بسرعة للسحور او انك مغلب اختك المسكينة وهي رايحة وجاية ؟؟

نوض وحدي كي نكون غير انا وخويا وتنوضني أختي لما تكون معانا لكن ناخذ احتياطي دائما وندير المنبه انا ايضا
وعادتي نومي خفيف نفطن بسرعة وما عنديش مشكل في هذا الجانب

في الحقيقة خويا هبلني من بداية رمضان استعملت معاه الوسائل كامل باش نوضو بصح ما يبردش قلبو حتى يطلعني ويهبطني 3 مرات على الاقل في لي زيسكالي
*****
علابالي كثرت عليك الاسئلة مي لازم تلوم اخونا محب الله على فكرتو الرائعة


تحياتي وسامحني مرة ثانية نتمنى اني كنت ضيفة خفيفة الظل

صحا فطوركم ونسأل الله ان يتقبل منا ومنكم صالح الاعمال

آمين .. جزاكم الله خيرا
ووفقكم لما يحبه ويرضاه
​

 

أهلا بالنجيبة لميس
رمضان مبارك

1/ في النهار لول انت تكون متعود قبل رمضان تشرب قهوة الله الله بالكخواصو والبتيباولا كاش قاطو، في رمضان كي تنوض وتنسى بلي ماكاش ماكلة في رمضان تتقلق ولاواش دير؟؟؟؟
قول الحقيقة لاخاطش

هههههههه كي كنت صغير كنت نكرهههههههه كي نتفكر بلي راني صايم وماكاش قهوة
علابالك واش كنت ندير ... الصباح ما نوضش بكري نخلي حتى يفوت وقت القهوة
وكي تلحق 12 نخرج برا نروح ندور حتى يفوت وقت الفطور
كان داير فيا حالة رمضان ههههه

لكن كي كبرنا عرفنا بلي الصيان ربي فرضو علينا ولازمنا نصبرو ونحسو بالنعم لي ربي اعطاهانا ونتفكرو بلي ربي راح يجازينا على الصيام

2/ كاش نهار كي كنت صغير في رمضان شربت الما وانت صايم بلعاني ودرت روحك زعما نسيت؟؟؟؟
ولا نسهلو عليك كاش مرة كنت صايم وغلطت وشربت الما وفقت لروحك كي كنت تشرب ،كمت شربت القطرة تالية ولا حبست تم تم
قول الصح لاخاطش كامل علابالنا بعقل الواحد كي يكون صغير


فقتيلي هههههه
مرة كي كنت صغير دخلت للكوزينة وطانت رائحة اللحم تشهي ... ما قدرتش نصبر كليت شوية بالتخبية هههه وكملت النهار واحد مافاقلي

ومرة كنت كبير شوية في السنة الاولى في الجامعة اول يوم تع رمضان نضنا وما علاباناش الوقت بالضبط لأذان الفجر المهم درنا كريم (قهوة وحليب) مع الحلويات
كي وجدنا كلش فوق الطابلة حنا قعدنا وبدينا نشربو وهو بدا يأذن وععععععع
ثم ثم فتينا لرواحنا وقلنا حتى يخلاص الآذان وبدينا نشربو بسرعة فائقة وناكلو الحلويات حتى قال المؤذن "لا إله إلا الله"
غاضتنا قعدنا شحال وحنا نوجدو غير كملنا وقعدنا بدا الأذان هههه

لكن لاحقا عرفت بلي لي يكون يأكل في صحن ويأذن عليه الفجر يجوز له ان يكمل صحنه حتى بعد انتهاء الآذان (هذا الامر ثابت في السنة)


مانكثرش عليك

أصلا الأسئلة تاعي نورمال

ماهمش محرجين

بصح رد بالك تنسى الأجوبة؟؟؟؟

ربي يجازيك يا مدللة المنتدى

لكن وين راهي أعز صديقة ليك ؟؟؟؟
ما سألتنيش !!!!!

​

[/QUOTE]

 

السلام عليكم ورحمة الله وبركاته

وعليكم السلام ورحمة الله وبركاته


صح فطور جميع الاعضاء

صح فطوركم

شكرا اخي محب الله فكرة رائعة

اما عن الأسئلة لم يترك الأعضاء الأسئلة في خصوص رمضان ولكن
أول أسئلتي.: هل حدث لك اليوم شيء مميز تريد الحديث عنه ؟

امممم لم يحدث شيء مميز
لكن اليوم كنت سعيدا لأني استطعت أن أحفظ ربع حزب وانا في طريقي للعمل صباحا ففرحت لذلك كثيرا
وأغتم الفرصة لأشكر صاحبة فكرة دورة حفظ سورة البقرة والأستاذة المشرفة على التصحيح .. جزاكم الله خيرا
بعد أن هجرنا القرآن عدنا إليه والحمد لله

ثانيا : ارجو ان اهتمام بالمنتدى لايشق عليك كيف تستطيع التوفيق في ادارته ؟

في الحقيقة مقصر كثيرا في حق المنتدى
أحاول قدر الامكان ادارته كما ينبغي لكن أواجه عقبات كثيرة بسبب بعد مكان العمل عن المنزل
والحمد لله بفضل الكثير من الأوفياء يسير فيض في الطريق الصحيح بإذن الله
والآن لا يمكنني ادارته بمفردي ولا يمكن لأي شخص ذلك
فنحن الآن نكون عائلة صغيرة تشرف على تسييره ونبذل جهدنا لتقديم الافضل والأيسر والصحيح لأعضائنا وزوارنا


صح صحوركم

جزاكم الله خيرا على الاهتمام
​